Do‘stlik va totuvlik tarannumi Turkmaniston Mustaqilligi kunida
29.09.2025
Toshkent irrigatsiya va qishloq xo‘jaligini mexanizatsiyalash muhandislari instituti Milliy tadqiqot universiteti Yer resurslari va kadastr fakulteti "Biologiya" yo‘nalishi talabalari tashabbusi bilan joriy yilning 27- sentyabr kuni Turkmaniston Mustaqilligi kuni munosabati bilan tantanali ma’naviy-ma’rifiy tadbir o‘tkazildi.
Tadbirning badiiy qismi barchaga alohida ruhiy ko‘tarinkilik bag‘ishladi. Turkman talabalari milliy liboslarda – «qo‘sh tepdi», «la’li» kabi go‘zal milliy raqslari bilan yig‘ilganlarga unutilmas bayramona kayfiyat ulashdilar. Sahnada O‘zbekiston va Turkmaniston madhiyalari yangradi, milliy kuy-qo‘shiqlar esa tantanaga o‘zgacha fayz qo‘shdi.
Ustoz va talabalar so‘zga chiqib, mustaqillikning bebaho qadri, millatlararo totuvlik va qardoshlik rishtalarining mustahkamligi haqida fikr yuritdilar. Badiiy chiqishlar, samimiy nutqlar va musiqiy sahnalar uyg‘unlashib, tadbirga o‘ziga xos badiiy jilva bag‘ishladi.Tadbirning tashkil etilishi ayniqsa Turkmanistonlik talabalar uchun katta taassurot bo‘ldi. Ular bunday e’tibor va samimiy mehrdan quvonib, o‘z minnatdorliklarini izhor etdilar.
Bu tadbir ikki qardosh xalq o‘rtasidagi tarixiy yaqinlik, do‘stlik va totuvlik rishtalarini yanada mustahkamlashga xizmat qiladi.
Yer resurslari va kadastr fakulteti tyutori Abdullayeva Oliya axboroti
Universitet matbuot xizmati
